Maa’imoa Faka’ali’ali Ngoue Vahe Fonua ‘Eua 2017

Monday, August 14th, 2017

Lau mai ‘a Vava’u Lahi, Ongo Niua, Ha’apai Veu mo honau ngaahi masani ‘oku ‘ikai ke holoa ai ‘a e Funga Fonua ia mo e Feleoko ‘o Maui.

Na’e huufi ‘a e Maa’imoa Faka’ali’ali Ngoue ‘a ‘Eua ‘i he ‘aho 22 Siulai 2017. Na’e tu’uta ‘a e ha’ele Tama Tu’i Tupou VI pea mo Kuini Nanasipau’u ‘i he mala’e Niu’eiki ke na ‘afio tonu ki he ngaue kafakafa mo to kakava kuo fai hona kakai, tatau pe ‘i tokanga, falehanga kae’uma’a foki ‘a Ngatai.

Na’e fakamamafa ‘a e to folofola ‘a e Tama Tu’i Tupou VI ki he ngaahi ngaue lava me’a ‘oku lolotonga fakahoko ‘i he funga fonua tautau tefito ‘i he to moli, vanila, ‘akau papa kae’uma’a ‘a e teu kau atu ‘a ‘Eua ki he teu to hina ke uta atu ki Siapani pea mo Kolea Tonga ‘i he ta’u ni. ‘Oku faingamalie makehe ‘a ‘Eua ko e ‘uhi ko ‘ene ofi ki Nuku’alofa pea mo e faingamalie ‘o hono ngaahi naunau fefolau’aki ‘i he vaha’a ‘o Nuku’alofa mo ‘Eua.

Na’e aofangatuku a ‘Ene tofolofola ‘aki ‘a ‘Ene talamonu ki he katoanga, mo ‘Ene FAKAAVA ai pe ‘e he Tama Tu’i Tupou VI ‘a e Katoanga MAA’IMOA FAKA’ALI’ALI NGOUE, TOUTAI MOE NGAAHI NGAUE ‘A ‘EUA ki he 2017.