Maa’imoa Faka’ali’ali Ngoue Vahe Fonua Tongatapu 2017

Thursday, August 17th, 2017

Na’e toki fakama’opo’opo ‘e Tongatapu ‘a e Maa’imoa faka’ali’ali Ngoue ki he 2017 ‘i he ‘aho 29 ‘o Siulai 2017.

Na’e tafitonga pea langi malie ‘a e me’a kotoa ‘i he Mala’e Manamo’ui ko e talitali ‘a e tu’uta ‘a e ha’ele ‘a ‘ene ‘Afifio Tu’i ko Tupou VI mo Kuini Nanasipau’u. Na’e me’a ai foki mo e Pilinisi Kalauni, Pilinisi Tupouto’a pea mo Pilinisesi Sinaitakala Tuku’aho kae ‘uma’a ‘a Pilinisi Taufa’ahau Manumataongo Tuku’aho mo Pilinisesi Mata’aho Tuku’aho ke huufi ‘a e Maa’imoa Faka’ali’ali Ngoue ‘a e Vahe Fonua Tongatapu.

Na’e ta ki ‘Uta pea Ta ki Fanga pea holoutounga ‘a e kau fa’a ‘o tokanga, kau nima mea’a ‘o falehanga ka e makehe ange ‘a ngatai, ke nau faka’ali’ali ki he Hau ‘a e fua taukakapa honau nima.

‘I he to folofola ‘a Tupou VI, neongo kuo a’u ki he $100,000.00 ki he ‘eka ‘a e ngoue kava ta’u 3 ‘a Vava’u mo ‘Eua hono fakatau tu’u ka ko e kau ngoue Hina ‘a Tongatapu ni ‘oku a’u ki he $1 miliona tupu ‘a e Pa’anga ‘oku nau ma’u ‘i he ‘eka ‘e 300 tupu ‘oku nau to. Na’e fakamamafa ‘a e tama Tu’i, ko e kau fa’a ‘o Tongatapu ni, ‘oku nau tokanga pe ki he tupu faka pa’anga kae ‘ikai fai ha tokanga ki he maumau ‘a e fonua. Hange ko hono ‘uli’i ‘a e vai ‘i lalo fonua pea mo e ngaahi mata fanga. Ko e faito’o tamate vao ‘oku ngaue’aki ‘i he ta’u ‘e he kau fa’a ‘oku a’u ki he lita ‘e 30000 tupu ‘i ta’u. Pea ‘i he ‘aluange ke to e lahi ange ‘a e afa mo e feliuliuaki ‘a e ‘ea, mole fonua he faka’au ke ma’olunga ange ‘a e tahi, mo to e mafana ange ‘a e ‘Ea tene uesia lahi ‘a e ma’u me’atokoni.

Na’e fakamamafa ai pe ‘a e To Folofola ‘a ‘Ene ‘Afio ko hotau tala mei ono’aho ki he tali honge ma’a Tongatapu. Ko e fai fakapotopoto taha ‘a ‘etau ngaue’aki hotau kelekele, ngoue, fangamanu, hakau mo honau koloa kae ‘uma’a ‘a e ngaahi me’a mo’ui kotoa ‘i he ‘Ea. Na’e folofola foki ki he founga fo’ou ‘o e ngoue mei Siaina mo Tailand pea mo e ngaahi fonua muli. Ko hono fakataha’i ‘a e ngoue Vesitapolo, ‘akau fua mo e fanga monumanu, mo e ano ika ‘i he ‘api ‘uta. Pea ma’u fakataha ai pe ‘a e me’atokoni mo hono kiki mei ‘uta.

Na’e fakamalo’ia’i ai pe ‘e he Tama Tu’i ki he ngaue kotoa kuo fai ‘e he ‘Eiki Minisita Ngoue Hon. Semisi Tauelangi Fakahau mo ‘ene kau ngaue kotoa ki he poupou ki he kau ngoue, toutai pea ke lava ke fai ‘a e fakahoko ‘a e Maa’imoa faka’ali’ali Ngoue ‘a e ngaahi Vahe Fonua takitaha.

Na’e faka’osi ‘ene folofola ‘aki ha talamonu ki he Vahe Tongatapu ki he Katoanga Faka’ali’ali Ngoue mo ‘ene faka’amu ke tau matu’aki tokanga telia ‘a e fonua mo e malu ‘o ‘etau ma’u me’atokoni pea ke fakaava ‘a e Maa’imoa Faka’ali’ali Ngoue ‘a Tongtapu ki he 2017.