FANONGONONGO KI HE MITIA

Saturday, April 10th, 2021

Potungaue Ngoue, Me’atokoni mo e Vaotātā (MAFF)

Nuku’alofa, Pule’anga ‘o Tonga

 9 ‘o ‘Epeleli 2021

‘Oku tuku atu ‘a e ngaahi fakamatala ko eni koe’uhi ke fakatonutonu ‘a e ngaahi fakamatala hala fekau’aki pea mo e fengaue’aki ‘a e Potungaue pea mo e Beijing Machinery Repair Company Limited (BMRCL).

1. ‘Oku ‘ikai ke ‘iai ha kaunga ‘a e Embassy ‘o e Pule’anga ‘o Siaina pea mo hono kau ngaue ki he fengaue’aki ‘a e MAFF pea mo e BMRCL.

• Ko e ngaahi palau na’e foaki na’e foaki ia ‘e he Pule’anga Siaina ki he Pule’anga Tonga ki he MAFF, pea na’e fakafou ia ‘i he Embassy ‘o e Pule’anga ‘o Siaina, ka ‘oku ‘ikai ke ‘iai ha’anau kaunga ki he tu’utu’uni ‘a e MAFF ki hono ngaue’aki ‘a e ngaahi palau koia. Ko e taumu’a ‘a e MAFF ke ne tokoni’i ‘a e kakai ‘oku ngoue ‘i Tonga ni ke fakalakalaka hake ‘a ‘enau ngoue ‘aki hono tokoni’i ‘a e BMRCL ke nau fakahoko ha ngaahi sevesi palau ‘oku ma’ama’a ange mo lahi ange ki he kakai ngoue ‘o Tonga ni.

• ‘Oku ‘ikai ko e taumu’a ia ‘a e MAFF ke fe’auhi pea mo e ngaahi pisinisi palau ‘i Tonga ni, ka ke fakaai pea mo tokoni’i ‘a e fiema’u ke to e lahi ange ‘a e sevesi ki hono teuteu’i ‘a e kelekele, pea ‘i he taimi tatau ke fakahoko ha sevesi ki hono monomono mo tauhi ‘a e palau ko eni ‘i Tonga ni. Ko e taha ‘a e ngaahi faingata’a ‘i Tonga ni ko e si’isi’i ‘a e kau ‘enisinia ki hono monomono mo tauhi ‘a e ngaahi palau ‘i Tonga. ‘Oku kau ‘i he aleapau pea mo e BMRCL ‘a ‘enau fakahoko ‘a e ngaahi sevesi monomono mo tauhi fakataha pea mo hono ako’i ha kau ‘enisinia ‘i Tonga ni koe’uhi ‘oku lolotonga tonounou ‘a Tonga ni ‘i he tafa’aki ko eni.

• Na’e tali ‘a e laiseni pisinisi ‘a e BMRCL fakatatau ki he Lao ki he ‘Inivesi Muli ‘i Sepitema ‘o e 2017.  

• Na’e tali ‘a e aleapau ‘a e MAFF pea mo e BMRCL ‘aki ‘a e Tu’utu’uni Kapineti 1198 ‘i he ‘aho 3 ‘o Novema 2017.

• Na’e fakahoko ‘a e aleapau ‘i he vaha’a ‘a e MAFF pea mo e BMRCL ‘i Fepueli ‘o e 2018.

• ‘Oku kau ‘a e totongi tute mo e tukuhau ‘i he aleapau ‘a e MAFF pea mo e BMRCL. Fakatatau ki he aleapau ‘a e MAFF pea mo e BMRCL ‘oku pehe, “Kuo pau ke totongi ‘e he BMRCL kotoa ‘a e ngaahi tukuhau mo e tute pea mo ha ngaahi totongi kehe pe fakatatau ki he lao lolotonga ‘a hono fakahoko ‘a ‘enau pisinisi”.

• Na’e ‘ikai ke foaki ‘e he MAFF ‘a e va’a ‘i Tokomololo ki he BMRCL. ‘Oku lolotonga nofo totongi ‘a e BMRCL ‘i ai pea ‘oku totongi hangatonu pe ‘e he pisini ‘a e totongi fakata’u ki he tokotaha ‘oku ‘a’ana ‘a e kelekele.

NGATA’ANGA ‘O E ONGOONGO TUKUATU